Ulih Anya Kedap (The Borneo Post)

SDNU nadai pekit Kumang/Keling tang ngambi raban main asal Dayak Kalimantan

KUCHING: Pengerami mantar Gawai Dayak ti diatur Serakup Bansa Dayak Sarawak (SDNU) taun tu jauh nyelaie, tang nyulut agi ari ke kala diatur ngelamatu.

Amat meh bala sida ke bujang enggau dara nadai gagit pasal pekit Kumang enggau Keling Gawai baka ke ngelamatu, malam hari Enam tu tadi sida bisi pengagit sereta pengandal ke bukai kena sida nganti pengagit nya.

Pengandal ati ka bala Kumang enggau Keling diganti enggau pengandal enggau pengangkunka bantai main asal raban Dayak ari Kalimantan ke berupai ngandalka ati semua bala pengabang mayuh malam nya.

Tu meh keterubah bala Dayak ari Kalimantan mantai main asal sida ditu. Ngelamatu sida mina kala enggau begawai sereta bisi mega belagu ba Dayak Music Awards (DAMA) 2008.

Ketuai Pengabang malam nya Menteri Pemansang Sosial enggau Urbanisasi Dato Sri William Mawan Ikom, berupai bendar gaga sereta andal meda pemanah bantai main asal bala sida menyadi kitai ari Kalimantan keterubah iya dibai datai kitu nyerimbai pengerami Gawai di nengeri.

Lebuh ke bejaku udah bekau meda pemanah bantai main asal ke bisi cherita ditusui – disengkaum dalam bantai main asal nya sekeda tebah musik asal nyengkaum engkerumung, dumbak enggau ketebung moden, sekeda indu enggau lelaki ngena ngepan Dayak/Iban ke ngajat enggau betanda moden – Mawan mantai peminta awakka kitai Iban mungkal siti pengerami nyemetak kena mantai pengayan sekeda main enggau pengawa asal ka penguntung bala di nengeri, kelebih agi bala nembiak rebak baru diatu.

“Manah bendar enti raban bansa kitai ulih ngatur siti pengerami tauka pesta baka ke diatur bala Bidayuh di Singgai baka ‘Pesta Birumuh’ enggau Gawai Redeems.

“Pengawa ke bakanya endang sigi patut udah lama bisi diatur kitai bansa, nya alai semua kitai anang enda berunding enggau manah pasal atur nya.

“Mayuh bendar main enggau pengawa asal ke patut dibantai, diayanka ngagai mensia mayuh dalam pengerami nya baka sekeda pengawa bumai, pengawa di rumah panjai.

“Ambika banding baka pengawa niki singut, iya nya niki tapang ti tinggi.

“Semua tu patut diayanka ngagai bala di nengeri ditu enggau sekeda bala bukai ke nadai penemu tauka enda kala enggau orang niki singut tauka manyi, enda nemu gaya bakani orang makau tapang nya awakka nyamai agi ditiki.

“Mayuh agi pengawa bukai ke patut dibantai, laban enti enda semua utai nya deka lenyau,” ku Mawan lebuh bejadika pengerami mantar Gawai Dayak SDNU nya ba Christian Ecumenical Worship Centre di Jalai Laksamana, ditu.

Kira bisi 800 iku bala pengabang enggau ngulu pengerami nya malam hari Enam.

Ngenang pasal’Pesta Birumuh’nya, bala Bidayuh di Singgai mungkal pengerami nya taun tu, tang Gawai Redeems nya udah lama diatur bala raban ti sama mega.

Mawan, ke nyadi presiden Parti Progresif Demokratik Sarawak (SPDP), madah tu ukai jaku tang iya deka nentuka pesta ari bansa Iban nyadi nyata, ke manah alai sida mantai main enggau adat asal sida.

“Aku deka meda siti pengerami sebaka enggau ‘Pesta Birumuh’ lalu kena nentuka iya nyadi nyata, aku deka baum lengkas enggau SDNU sereta mega Sadia (Serakup Dayak Iban Sarawak) awakka pekara tu nadai betangguh sereta jampat teputar,” ku Mawan.

Menteri nya mega madah bala raban bansa Iban endang chukup kaya dalam main enggau adat asal ke mesti dibun sereta dijaga enggau manah, ka tambah nya mesti naka ulih dikemeran awakka terus idup.

Iya madah, opis menteri iya endang sigi keran nyukung pesta tauka pengerami ke bakanya, laban nya endang manah kena ngibun, nyaga sereta ngidupka adat enggau main asal siti-siti bansa etnik.

Ka tambah nya, menteri nya mega madah raban bansa Iban patut terus begempung, anang bepechah tang terus berakup enggau pangan diri nyapai juluk ati ti dikunsi semua lalu nguat sereta ngeringka agi raban bansa diri.

Bala Iban, ku iya, patut sama segulai sejalai enggau pangan diri, berakup ngempung diri nyadi siti raban ti kering, bekenjing sereta bepanggai ba pengaya main enggau adat asal sereta penemu enggau pengering bukai awakka bansa Iban terus mansang muji.

“Kitai (Iban) enda tau enda sa’ati segempung enggau pangan diri.

“Kitai engka ngereja siti-siti atur pengawa tauka kereja nya ngena jalai ti bebida, enda sebaka enggau pangan, tang batang tuju iya tauka objektif iya endang sama, iya nya kena begempung, sa’ati enggau pangan.

“Nadai guna kitai bachukka pangan, bejaku mantah melakang pangan diri, laban pekara nya mina ngelemika bansa kitai empu, ukai ngering enggau ngempung, tang ngasuh kitai pechah sereta lembut, lalu nya nyadi ka penekul enggau penanggul pemansang raban bansa kitai empu,” ku Mawan.

Iya mega madah, penyerakup sereta gempung ati nya ukai ungkup kelab, gerempung tauka ba renggat serakup aja, tang ungkup semua bala mayuh dalam raban bansa nya.

Kelimpah ari ke alai ngayanka main enggau adat asal bansa Dayak, Mawan madah pengerami nya mega kena ngerupitka agi kaul entara raban bansa, entara pangan lalu mega siti awak ti manah kena betemu sereta bekelala enggau pangan baru.

“Gelumu Gawai Dayak, kelimpah ari nyadi ka kenjing kitai ngerami sereta nurunka pesaka asal ari aki ini kitai kelia, iya mega kena kitai neguhka tanggam kaul kitai enggau diri sama diri, ka tambah ke nyadi forum kena bekelala sereta beteleba enggau pangan baru ari semua raban bansa,” ku iya.

Lebuh ke bejaku dulu ari nya presiden SDNU Mengga Mikui meri basa besai ngagai menteri nya ke siru bendar udah magi jam iya datai nyadi ketuai pengabang ba Gawai nya.

Mengga mega meri besai terima kasih ngagai perintah ke udah meri kelala ngagai pengerami Gawai Dayak, ke diatu dintu di serata Malaysia.

Iya madah, SDNU nya siti raban ti ngemeranka promosi adat enggau main asal bansa Dayak.

Ku iya, gulu ba pengerami nya mega awak ti manah kena muai pengelengau ka bala pangan enggau kaban belayan, lalu serentak enggau nya kena betemu enggau pangan baru.

Chermin pengatur Dr John Brian Anthony madah pengerami nya kena mantai main asal bansa Dayak, ka tambah mega kena betemu sereta bekelala enggau pangan baru.

John seduai Mengga sama meri besai terima kasih ngagai Mawan ke semampai nyukung pengawa ke diatur SDNU ngelamatu.

Tang bantai main asal ke balat ngandalka ati menteri nya nadai lebih ari pantun ari siku indu, iya nya Chigu Lin ke muji Mawan berengkah ari pengada iya ngagai maya kediatu ke alai iya bisi ‘megai menira dua nuju pemansang’.

Enti dalam jaku orang putih, chigu nya diberi ‘standing ovation’ laban Mawan empu lalu bediri nempikka jari sereta nayuk minta chigu nya datai lalu nyibur iya enggau ai tuak kena meri terima kasih.

Dulu ari tu, tukang pantun tebilang Roselind Muntai ke berasal ari Kapit mega bisi mantai pantun puji ka ketuai pengabang enggau bala pengabang bukai. Endang chukup mantik ga pemanah nyawa Roselind.

Kelimpah ari nya, bisi dua iku penyanyi sama mantai pengelandik belagu, iya nya Richmond Alan Morsidi ke tebilang enggau lagu Semina Duduk Berimbai sereta Elval, siku penunda Elvis, ke dispunsa dua kali belagu.

Lebuh ke tembu mai lagu dispunsa ungkup ‘Sada Nyawa Mas’ Mawan mega ngerah madah bisi meri duit ari iya empu RM5,000. Nya meh munyi tempik jari mensia mayuh, nyau enda nemu agi penginggar.

Pengerami tembu udah bala sida ari Kalimantan mantaika siti main asal ke bechampur enggau ajat indu lelaki enggau lagu disempulang tebah sape enggau tabuh ala Dayak Kalimantan ti chukup ngerinduka ati.

Lepas nya bala pemesai nyengkaum Mawan empu sama niki panggau lalu sama ngajat bebala mayuh begulai enggau sida ari Kalimantan. Nya endang tanda pengaga enggau pengandal ati ka pangan.

Nya alai amat idup meh rambai jaku ‘showcasing Dayak Cultural Heritage’ (Ngayanka Aris Pesaka Tuai, Main Asal Dayak) pengerami mantar Gawai Dayak SDNU nya hari Enam tu tadi.